مدري هي الدنيا كذا والا تصانيف البشر.. . ... .

ياقدرة الله كيف عشر احلام ماعادت عشر
ماعادها نفس الوزن والطول ماهو طولها



احيان يصدمك الغباء واحيان يصدمك النشر
واحيان تصدمك الحظوظ اللي تجر ذيولها



مدري هي الدنيا كذا والا تصانيف البشر
عجزت الاقي كلمة ٍ تمشي على مدلولها



النار مبداها شراره بعد هذا تنتشر
تسري على روح الهشيم وتستثير خيولها



والناس يافيهم بشر تموت في حب القشر
ماتستريح الا على صوت العزاء وسمولها



يمكن خطاي اني رجل شامخ ولا احب الخشر
ويمكن خطا ذيك الوجيه العابسه بقفولها



ويمكن يكون الوقت يلعب دور كذاب ٍ أشر
يرسم تفاصيل الطموح ولا يقرب حولها



عزا الفقير اذا التقى التجار في يوم الحشر
يشوفهم مثل الهنود اللي تخيط نعولها



غوار في فلم "الحدود" اثنى على كلمة فشر
وانا على رايه بعد بقولها واقولها



بالمختصر .. لااحد يلوم ابن الفقير اليا دشر
دامه يشوف ابن الغني كوش على محصولها