عزي لحالي والديار خلـي عقـب الراحليـن
اللي مضوا درب السفر والبعد طالـت مدتـه
أقفوا وخلوني وقلبـي مجزعـه كثـر الونيـن
وخلو فراغ فالعمـر كـل البشـر مـا سدتـه
خلوني أبكي بعدهم والهـم فـي قلبـي دفيـن
صكت على قلبـي غرابيـل الزمـان وهدتـه
صرت أتبع الهوجاس وأسري لا ذكرت الغايبين
كنـي يتيـم مالقـا امـه راح يتلـي جـدتـه
ويلاه يا وجدي عليهم وجـد مظلـوم سجيـن
خلوه ربعه يوم ضـرب الوقـت زادت شدتـه
خلـوه يصـرخ ويتطلـب مالقـا قلـب يليـن
ضدوه واقفوا دون رحمه والصـوادف ضدتـه
أو وجد عـود ذره بنيـات مـا جالـه بنيـن
خارت قواه وطاح معتل وعجـز عـن كدتـه
اليا فتح عينه وإلى هن من يسار ومـن يميـن
هن مالهن غيـره وهـو كـف المنايـا لدتـه
القلب قطعـه البكـا ونياطـه أبلاهـا الحنيـن
يسري ويهرب عن همومه والمصايـب ردتـه
يا طول ليلي بعدهم يا جـور دورات السنيـن
يا ويل قلبي دام سيـف الوقـت زادت حدتـه
وعزي لحالي والديار خلـي عقـب الراحليـن
اللي مضوا درب السفر والبعد طالـت مدتـه
